Ramiz Mirzəyevin yeganə oğlu qəzada həlak oldu - FOTO
Mərhum AFFA prezidenti Ramiz Mirzəyevin oğlu Anar Mirzəyev avtomobil qəzasında həlak olub.
1news.az xəbər verir ki, hadisə ötən gecə Sabirabadın Həşimxanlı kəndində baş verib. 33 yaşlı Anar Mirzəyev olduğu “Jeep” markalı minik avtomobili su kanalına aşıb.
Dövlət Yanğından Mühafizə Xidmətinin yanğınsöndürən-xilasediciləri minik avtomobilində olan 1985-ci il təvəllüdlü Mirzəyev Anar Ramiz oğlunun cəsədini deformasiyaya uğramış nəqliyyat vasitəsindən çıxarıb, aidiyyəti üzrə təhvil veriblər.
Ailənin yeganə övladı olan Anar Mirzəyev bu gün Tovuz rayonunun Dondar Quşçu kəndində atasının yanında dəfn olunacaq.
Qeyd edək ki, Ramiz Mirzəyev Azərbaycan Respublikası Dövlət Neft Şirkəti "Azərneftyağ" istehsalat birliyinin baş direktoru, "Azərneftyağ" neft emalı zavodunun direktoru, sənaye və energetika nazirinin müavini vəzifəsində çalışıb. O, 2003-cü ildə Azərbaycan Futbol Federasiyaları Assosiasiyasının prezidenti seçilib. Yeni Azərbaycan Partiyasının İdarə Heyətinin üzvü, YAP-ın Xətai rayon təşkilatının sədri idi. Ramiz Mirzəyev 2007-ci ildə vəfat edib.
Onu da qeyd edək ki, keçən il Hacıqabulda "Toyota Land Cruiser"in ağır qəzaya düşməsi nəticəsində Ramiz Mirzəyevin qardaşı oğlu Orxan Mirzəyev vəfat edib.
1news.az
